Job 15

Elipas i pitapitau Iob

1Ma Elipas ra te Teman i ga tata ma i ga biti:
2Dave, a tena kabinana na tatata vakuku damana,
Ma na vabuka ra balana ma ra vuvu maro ra matana taur?
3Dave, na vartoto ma ra tinata vakuku,
A umana tinata nina ba pa na vuai ra vuaina?
4U tak vue ra variru pire God,
Ma u tur bat ra nilotu tadav God.
5Kaum varpiam i tovo ra ngiem,
Ma u mur ra tinata kai ra umana tena vakikiu.
6A ngiem iat i takun u, iau pata;
Maia, a ura bul na ngiem dir varvai ure u.

7Dave, u laka ra luaina tutana ba di ga kava?
Ma u ga laun lua laka ta ra umana lualuana?
8Dave, u kikivung laka ma diat ta ra kivung kai God?
Ma kaum uka ra kabinana laka?
9Dave, u nunure laka ta magit nina ba pa amital nunure?
Ava bar ra minatoto i ki piram nina ba pa amital ga matoto tana?
10I tar kua ra pepe na ulu i mimital ma amital patuana muka,
Ma amital ga laun lua tai tamam.
11Dave, u nuk vaikilik pa ra umana tinata na varmaram kai God,
Ma ra umana varpit na varmari?
12Ta ra ava ra balam i kure u,
Ma ta ra ava a ura kiau na matam dir kolakolo?
13Upi una tut ure God,
Ma ra umana tinata dari na irop kan ra ngiem?

14Ava bar ra bilua na tutana, upi na gomgom?
Ma nina ra vavina i ga kava, upi na takodo?
15Ea, ona God pa i nurnur ta kana umana angelo,
Ma ra bala na bakut i dur ta ra luaina matana,
16Na dave bar ure ta ra tikai i bilak ma i kaina kana mangamangana,
A tutana nina i mome ke ra varpiam da ra tava?

17Una ki na valongor, ma ina tata piram,
Ma ina ve u ure ra magit iau matoto tana:
18(A tinata nina a umana tena kabinana dia ga kap pa ia
Tai ra umana tama i diat, nina pa dia ga ive;
19Nina dia ga vatur vake ra gunagunan,
Ba pa ta vaira i ga ki livuan ta diat):
20A kaina tutana i kairane ra kinadik ta kana kilakilala na nilaun parika,
Ta nam ra umana kilala ba di ga luk value upi kai ra tena vakavakaina.
21A talingana i pitalinge ra umana magit na bunurut;
Ra tena vavaranai na tadav ia ba i ki bulu boko.
22Pa i nurnur ba na talil kan ra bobotoi,
Ma ra pakat na vinarubu i ki ung pa ia.
23I tikan vurvurbit upi ra gem, ma i biti: I ki ave?
I nunure ba kana bung na marum i ki maravai ka;
24A varmonong ma ra nginarao dir vaburut ia,
Dir uvia pa ia da ra king i ki na vaninara upi ra vinarubu.
25Tago i ga tut ure God,
Ma i ga malamala ngala pire ra Dekdek Muka
26Ma i ga vutvut tadav ia ma ra kolakolo na nuknukina,
Ma i ga kap ra dekdek na bakbakit;
27Tago i ga vartap ma ra bira,
Ma i ga vatubu ra pal a pakana,
28Ma i ga ki ta ra umana pia na pal dia lingling,
Ta ra umana pal nina pa i topa ia ba ta tikai na bang ta diat,
Tago dia to na tarip.
29Pa na uviana, ma kana tabarikik pa na ki vatikai pirana,
Ma kana uma pa na manga vuai.
30Pa na lop kan ra bobotoi;
A umana ingarina diat a maranga ta ra malamalapang i ra iap,
Ma ra vuvu na kap vue ra umana pupuna.
31Koko na nurnur ta ra magit vakuku, nina i valunga pa ia iat mulai tana,
Tago na vatur vake ra magit vakuku upi kana vapuak.
32Na kap vapar ia ba pa i ti ot boko kana e,
Ma ra gogono na makuk uka.
33Ra vuaina na bura ka da ra kura vain i molo,
Ma na vabura vue ke ra pupuna da ra oliva i amar kapa.
34A umana bartalaina ta ra varpiam diat a biu,
Ma ra iap, na vaimur vue ra umana tena kul varbat.
Dia lalau pa ra tavir, ma dia kava vaarike ra bilak na mangamangana,
Ma ra bala i diat i vaninare ra vaongo.
35